政情：公文袋人財兩失

「佔後」 有氣無碇抖

今年係公文袋創黨九周年，過往數年嘅三月底、四月初，公文袋都會喺尖沙咀一間酒店搞籌款晚宴，事前會周圍呼籲有心人捐出貴價紅酒同畫作，等佢哋喺晚宴上搵人「揼心口」捐錢，不過今年情況疑一反常態，直至目前為止，公文袋依然未有任何搞籌款晚宴嘅打算。

據聞公文袋內部之前傾過今年搞唔搞籌款晚宴，唔少執委認為舊年經歷政改爭議同佔領行動，唔少黨員都已經忙到有氣無碇抖，而再搞籌款晚宴就真係「有心無力」。

公文袋發言人證實，該黨暫時未有搞晚宴嘅打算，又話雖然每年都會慶祝黨慶，但就唔會年年大搞，今年暫時亦無大型籌款活動，但其後又留有一手話，要黨內再傾下先至可以作最終決定喎。

不過，籌款晚宴一向係各政黨吸金嘅大好機會，好似白鴿黨原本計劃舊年十一月搞籌款晚會，但因撞正佔領行動，押後至下月繼續舉行。

由始至終都無諗過籌款活動，而事實擺在眼前，如今佔領行動已經告一段落，公文袋竟然仲可以此為由唔搞籌款晚宴，真係信不信由你，更加令人懷疑背後係咪有不可告人嘅原因，甚至係另有內情。

歐飛離職 「替補」未定

除此以外，公文袋仲面臨人才荒，事關該黨原總策劃幹事黃晙涉非禮案，早前由英國讀完書嘅歐陽志飛（歐飛）臨危受命暫時做住總策劃幹事一職，不過據聞歐飛做到今年三月就會離職，該黨依家都未諗定「替補」人選，隨着年底區議會選舉將近，公文袋中人既煩緊選舉部署，依家仲要忙住搵人做「大內總管」，認為屋漏偏逢連夜雨，都咪話唔頭痕。