政情：中環出更：周永康自爆海外升學夢
佔領行動上月中落幕，「雙學」代表陸續重返校園生活，其中學聯秘書長周永康（Alex）率先自爆將於年底畢業，但畢業後唔諗住打工，希望到海外做研究生，首先讀番個碩士，最終希望讀到哲學博士。
其實於佔領行動期間，早有消息話Alex已獲外國大學獎學金，等佢唔使愁後路，不過Alex強調無咁嘅事，當問及會否擔心佔中惹上官非而留有案底，未能到外國升學，佢就話唔驚得咁多，只能見步行步。
同「港大退聯」辯論
不過，Alex唔使諗咁遠住，擺在眼前要先處理二月九至十三日，就港大學生會係咪退出學聯進行公投一事，尋日就有論壇於港大舉行，邀請Alex、港大學生會會長梁麗幗同兩位「港大退聯關注組」成員即場辯論此事。
其中關注組成員多數認為，學聯作為八大院校溝通平台，透明度太低，甚至認為學聯搞到港大學生會失去獨立自主性，所以先提出港大退聯。無論今次公投結果係點，毋庸置疑嘅係，學生對學聯同港大學生會嘅不滿聲音逐漸增加，如果學聯唔正視呢個問題，可以預期支持者會繼續不斷流失。
卓妮