政情：中環出更：喜馮新年買衫講心得
距離農曆新年三個星期左右，政商界名人開始陸續辦年貨同買新衫，撞啱日前有服裝品牌於沙田馬場舉行盃賽，一眾城中名人就大談佢哋添置新裝嘅準則，其中罕有現身馬場嘅利豐集團榮譽主席馮國經嘅女兒馮詠儀（Sabrina），以一身黑色長裙配襯藍色帽及飾物亮相，佢自言每次着衫重點唔使多，好似佢呢日知道會戴幾件藍色飾物，就會盡量揀條淨色嘅裙，等人望落唔會太花。
「啱品味性格 仲要啱身」
當問及有冇買新衫畀老公時，Sabrina話揀男人衫好有學問，除咗要清楚對方品味同性格，仲要夠啱身，事關女人嘅高踭鞋只要靚，就算緊都會照着，但男人買鞋如果刮腳或件衫唔舒服，就會擺埋一邊。
名媛林李婉冰（Nina）同女兒林嘉寶齊齊以黃色元素打扮亮相。Nina透露，自己間中會幫兩個仔買衫，而最困難嘅係兩個仔着衫風格唔同，一個鍾意淨色，另一個就鍾意玩款式，有時買咗畀佢哋唔啱，就惟有拎返去換另一個款或者送畀人，加上衣着口味不時會變，佢仲笑言要定時留意住個潮流。
同場現身仲有荃灣區議會主席陳耀星之子陳湛全（Charles）及太太葉鳳屏。Charles表示，自己好鍾意着格仔恤衫，又欣賞日本西裝剪裁特別適合東方人身形，細節位亦較多，至於歐洲嘅西裝就傾向多啲色彩，好似紅色或者綠色褲咁，以往好少本地人着，近年就多咗港人接受喎。
卓妮