投資回報長期唔理想，正常嚟計梗係斬倉離場。不過咁，世上有一種投資，無論蝕得幾勁，都焗住要繼續加碼，你話係咪荒天下之大謬吖？冇錯嘞，講緊嘅之唔係強積金囉。
係咁嘅，強積金管理局尋日就供款檢討諮詢公眾，建議檢討期由四年一次改為每兩年一次，供款下限因應最低工資即將上調，由現時就業收入中位數五成，提高到五成半；至於供款上限，則維持喺就業收入最高九成嘅水平，建議以後檢討每次最多調整五千元。
正所謂，黃台之瓜，何堪再摘，今時今日百物騰貴，打工仔要應付日常生活開支已經捉襟見肘，仲要供多啲強積金，簡直雪上加霜，特別係基層市民，以為最低工資加咗可以幫補吓啦，點知強積金都係供多咗，一來一回，都係無乜肉食。仲有喎，供款上限雖然暫時維持不變，但唔保證之後會唔會上調。你知啦，中產乜嘢福利都享受唔到，早就怨聲載道，叫佢哋強積金供多啲，嘈到拆天都似。
即係咁，強積金如果回報理想，打工仔未必介意供多啲，可惜現實啱啱相反，舊年平均回報率只係得百分之一點五，遠遠跑輸通脹。早前有工會比較市面五百幾隻強積金嘅表現，更加發現當中近九成差過盈富基金。市民嘅血汗錢好似滾水淥豬腸咁兩頭縮，已經揼心口，萬一退休時撞正金融危機，分分鐘渣都蝕埋，到時真係喊都無謂。
話時話，強積金制度先天不足，後天失調，早就有口皆悲o架喇。回報低都算嘞，最離譜係唔理投資輸贏都好，基金經理佣金照樣袋袋平安，有人將強積金形容為「強輸金」，真係一針見血。冇錯，當局近年推出唔少改革措施，包括半自由行、收費封頂以及整合帳戶等等，可惜通通都係小修小補，無助解決根本問題。
事實擺在眼前，作為安老三條支柱之一嘅強積金，根本保障唔到市民退休生活。一早有人建議，與其坐視強積金繼續搵市民笨，不如索性轉型為全民退休金，只要喺現有僱員同僱主雙方供款嘅基礎上，港府出多一份，就可以成事。老實講，港府坐擁金山銀山，錢唔係問題，怕就怕縮骨唔肯承擔嘅啫。呢，港府最近放聲氣話喺退休保障引入資產審查，講到尾咪為咗卸責囉。
計功夫茶話齋，確保市民老有所養係政府嘅基本責任，與其喺強積金方面玩花樣，不如早啲下決心推動全民退保喇。嗱，有辦你睇，當年貪曾因虐老被公公婆婆打小人，打到滿臉鞋印樣衰到極，唔該官僚好自為之啦。