立法會周三召開咗今年第二次會議，但因為法定人數不足而流會，有議員就賴主席突然要求開多半個鐘，又有人鬧泛民議員無啦啦要記名點票。據聞秘書處為防止流會情況再次發生，就提議咗新招，將周三嘅大會提早在晚上八點完會，有咩傾唔完就周四續會，聽講大部分議員都舉腳贊成。不過，開會係議員嘅職責，咁樣「斬腳趾避沙蟲」遷就啲議員，咁不如薪津都按比例扣減啦！
秘書長陳維安尋日就去咗泛民主派飯盒會推介新措施，佢就當然唔會話「你班人信唔過，所以要提早完會」啦！佢曉以大義，話平時十點鐘完會，秘書處職員要執嘢執到十二點鐘先放工，第二日續會又要提早兩小時準備，即係七點返工，所以提早完會可以畀秘書處職員多啲時間休息。
據了解，不論建制派同泛民議員都表示贊成，其實班議員個個都想提早收工，依家有得名正言順早走，又點會反對呢？不過，為咗遷就班懶惰議員，會議時間已經愈縮愈短，仲記得十幾年前，啲議員要通宵開會都唔會有咩怨言，依家開多半個鐘都大條道理要流會，點解議員人工愈來愈高，責任心反而愈來愈低呢？