立法會財務委員會（財委會）尋日開始審議排喺創新及科技局撥款前嘅漁業貸款撥款申請，由於泛民主派不滿政府喺今個星期突然抽起首四項議程，佢哋就連漁業貸款都唔放過，不斷提議程「拉布」。社民連梁國雄（長毛）喺發言時鬧爆漁農界代表何俊賢（高佬賢），話佢個樣青靚白淨，個身無魚味又無海水味，淨係有時聞到有陣古龍水味，唔知邊忽似漁農界代表，反而上屆議員黃容根似啲。長毛呢番話搞到高佬賢尷尷尬尬話，立法會有唔少議員靚仔過佢，唔覺得自己特別靚仔喎。
