政情：「張李楊」專政 老嫩鴿劈炮
民主黨（白鴿黨）去年底選出新一屆領導層，雖然該黨當時力挺一班中委嘅平均年齡唔過三十歲，加上一直控制黨內事務嘅「張李楊集團」（張文光、李永達、楊森）代表宣布唔競逐中常委，令人覺得該黨似乎已經改頭換面。不過，據聞該黨元朗區議員張賢登及鄺俊宇（Roy）因不滿「張李楊集團」仍然暗中控制黨內行政事務，所以決定退任中常委職務。
高層勸留 傳張不為所動
白鴿黨中委會前日開會，通過接納張賢登同Roy因為私人理由辭退中委職務。有該黨中人話，二人其實喺聖誕節前已萌生去意，但黨內一直有極力游說兩人留低，但係最後唔成功，而中委會將會喺適當時候召開會員大會進行補選。
有白鴿黨中人爆料話，其實該黨喺選出新一屆中委後，黨內唔少第二梯隊見到新一批中委多數係「張李楊集團」分子，已覺得換屆係「換湯不換藥」，有人更萌生去意。不過，當時以主席劉慧卿為首嘅領導層不斷游說眾人唔好辭職，費事畀人覺得該黨成日內訌。但據聞張賢登依然不為所動，覺得「張李楊集團」持續操控黨內當權少壯派，於是憤然退出中委，而Roy就同師傅一齊遞信。
鄺唔驚影響出戰超選機會
我哋問過Roy，佢話喺聖誕節前已經向黨領導層遞信，當時唔少人都有挽留佢，但由於想當年係張賢登帶佢入中委，依家師傅要走，佢一定會共同進退。對於有人質疑Roy係因為不滿「AV仁」何俊仁發動辭職公投而辭去中委，Roy就話自己一早決定辭任中委，同AV仁事件絕對無關。
Roy早前被指有機會接替AV仁選超級區議會議席，被問到依家辭中委會唔會影響佢出選立法會嘅機會時，Roy坦言一直專注地區及作家工作，相信該黨考慮搵人出選時，唔會因為佢並非中委而唔考慮佢喎。我哋尋日亦有搵過張賢登，但至截稿前未有回覆。