政情：中環出更：蔡堅 史泰祖被「脅迫」握手
一場佔領行動搞到社會撕裂，連醫學界都唔例外。香港醫學會會長史泰祖同前會長蔡堅早前就因為搞佔中立場民調鬧不和，蔡堅曾經揚言如果有人搞到醫學會「亂晒大龍」，佢隨時可出番嚟選會長喎。過去一段時間，蔡堅一直「黑面」唔多理睬史泰祖，但尋日醫學會舉行傳媒午宴，兩人竟然握手兼合照，實在難以置信，究竟發生乜事呢？
謝鴻興策動 周伯展幫拖
促成今次「破冰握手」嘅，多得前會長謝鴻興充當和事老。謝醫生甫到會場，即講笑話和諧先好，隨即拉住史走到蔡身邊，捉住兩人隻手握埋一齊。醫學會副會長周伯展亦「幫手」，搞到蔡好似被人挾持住咁。此情此景，蔡勉強唧出少少笑容，場面尷尬。史大讚謝鴻興識做，話「抵請你食飯！」
蔡堅提到近期動向，話有人正成立基金會，向佔領行動人士提供法律或醫療援助，佢會以個人身份幫手審批基金申請，強調自己係政治中立喎。
卓妮