港府管治無能，九唔搭八，幾離奇嘅事都會發生。好似警方對付佔領黑手咁吖，唔係上門拉人封艇，而係搞乜嘢「預約拘捕」，仲客氣過請客食飯；又好似香港郵政咁吖，經營不善，頻頻見紅，唔係改善服務，增加收入，反而諗縮數提早關門，唔愈窮愈見鬼至奇喇。
講到香港郵政嘅醜聞，不能不提涉嫌違法滋擾正義傳媒呢一筆。大家一定記得，東方報業集團去年十月三十日收到一封已寄出兩個月、懷疑地址有誤而被退回嘅公文袋郵件，呢個被人拆開嘅公文袋內藏另外九封同日寄出嘅信件，呢九封「信中信」地址無誤，郵資不少，點解會被打番轉頭，而且其中一封仲被人開封後再以膠紙封口？鑑於成件事疑點重重，東方報業梗係第一時間向香港郵政投訴，兼且報警處理喇。
嗱，香港郵政係就係曾經派人嚟報館調查，仲裝模作樣成立專組跟進添，點知全部都係整色整水，一味死拖爛拖，直到上月底先至寄封信嚟，承認事件「極不尋常」，「未有按正常程序分流」，同埋「喺隨後嘅郵件處理流程中出現問題」，但究竟係邊個出錯、係咪政治打壓、如何懲罰責任人等等，就隻字不提，連句道歉都冇，淨係話已經交畀警方調查，現階段唔適宜進一步披露調查內容喎，簡直係廢話連篇。
好嘞，件事拖到依家已經足足兩個半月，點都應該查完喇啩？可惜吖，成件事冇晒下文，擺到明係玩拖字訣，企圖大事化小，不了了之啫。正如學者話齋，家陣係咪真係查緊都冇人知，香港郵政必須清楚交代，否則只會令市民信心盡失，日後仲點放心寄信喎。
其實，成件事唔止打擊市民對郵政嘅信心咁簡單，直頭係針對正義傳媒嘅惡意滋擾同埋政治打壓喇。咁多年來，正義傳媒備受政府部門打壓，消防處、衞生署、食環署、警務處、淫審處、平機會等等輪流上陣，今次由香港郵政出面做打手，有乜出奇吖。所以話，反中亂港有賞，愛國愛港受罰，淨係睇吓佔領黑手逍遙法外，正義傳媒飽受滋擾，就知當局倒行逆施，忠奸不分，香港有乜法子唔烏煙瘴氣、亂象叢生吖！
不過咁，公道自在人心。有立法會議員就講得啱嘞，今次事件涉及傳媒機構，性質嚴重，香港郵政必須從實招來，絕對唔容許不了了之。亦有議員指出，問題出喺郵政內部，當局有必要進行內部調查，唔應該將責任推晒畀警方。好多議員仲講到明，此案一日無結果，仍然會喺立法會繼續跟進。
冇錯嘞，得道多助，失道寡助，郵政官僚收到未呀？今時今日乜都講透明，小小衙門想學人隻手遮天、瞞天過海，唔使旨意吖！