創新及科技局未知何時何月先至成立， 但政府內部一直都有政府資訊科技總監辦公室呢個部門，處理科技有關事宜。總監賴錫璋任期今個月完結，現已離任，政府早前決定對外公開招聘。但近期業界就有消息傳出，話政府已經內定由現時副手林偉喬接任，搞到一班遞咗信申請呢個位嘅IT人罵聲四起，話政府搞咁多嘢都只係走過場，睇嚟開局未成，就先惹來一番爭議。
當年賴錫璋上任，係因為前任總監葛輝嘅離任。不過，賴錫璋以六十四歲之齡上任，卻惹來非議，有人質疑佢年紀咁大，亦有人話佢偏向泛民主派，搞到建制派都唔妥佢，但事實係咪咁仍有待證實。儘管咩傳聞都好，一切已成過去，政府亦喺去年十一月公開招聘總監一職，聽聞吸引咗幾十名申請者，當中包括業界名人。不過，最近傳出消息話總監一職已有內定人選，於是搞到一班IT人慶合合。
不過，有政府中人解釋，政府對公開招聘係非常認真，一定會完成整個招聘過程，否則公務員事務局就會出聲。另外，有建制派中人問過，話政府經過初步遴選，會喺下個月開始約見十個八個申請者，所以一班有意做總監嘅IT人就唔使擔心喇。