政情：瑞郎狂升 鐘錶界「展」望對策
瑞士央行上周宣布取消歐元兌瑞士法郎嘅最低匯率限制，令瑞士法郎大幅升值，對本地鐘錶界亦有影響。香港工業總會主席兼運年錶業集團董事總經理劉展灝（Stanley）話，瑞士日內瓦本周有個大型鐘錶展覽，佢會飛去當地了解及與其他大型鐘錶品牌商討對策。
料大牌子減價應戰
Stanley話，早前瑞士央行講過唔會同歐元脫鈎，所以今次可以話令佢哋措手不及，除咗對鐘錶價格有影響之外，當地旅遊業及出口都會大受打擊。雖然因為匯率影響而令瑞士鐘錶入口價大幅上升，但佢估計唔少大品牌亦會擔心影響銷售而下調價格，而廠商、零售商會分擔上升成本。佢話，始終過去一年鐘錶業及奢侈品銷情一般，如果將大部分加幅轉嫁畀消費者，擔心會令生意雪上加霜。