政情：「新」招獻政改 區選變相公投
政府喺政改次輪諮詢開始後，將舉行三場地區諮詢論壇，尋日頭炮係殺入新界。正當大家以為會好悶，只講埋啲八股嘢之際，原來部分新界人都幾有創意，例如就有市民話，要合法又科學化咁表達市民意願，不如喺年底區議會選舉，加多一項「政改應否通過」畀市民選擇啦，咁民意咪得到彰顯囉。嘩！呢個建議其實同「公投」無咩分別，足證新界人士唔係咁保守嘅。
另倡十八區薦特首參選人
面對呢啲咁有創意嘅講法，政府政改三人組好彩仲招架得住，話時間上呢個做法唔可行，因為年底就係區議會選舉，但政改喺年中就要表決。
又有新界市民建議由全港十八區分別選出十八名特首參選人，然後再由提名委員會從十八人中選取兩至三人「出閘」。咁咪即係變相「公民推薦」？估唔到新界人咁有創意。
反而其他在席人士，發言多過建議，例如立法會議員陳克勤叫市民一人一電話，打畀泛民主派議員游說佢哋支持政改，港區人大代表王庭聰就話，特首候選人兩至三個就夠，太多分分鐘花多眼亂喎。