政情：中環出更：泛民拉布 殃及池「魚」
政府喺今個星期初突然宣布撤回立法會財務委員會（財委會）首四項議程，明日會直接審議原本排喺較後嘅漁業貸款同創新及科技局（創科局）撥款申請。不過，「拉布」四子表明為咗令政府喺農曆新年前成立創科局嘅好夢成空，會不惜一切拖垮創科局，變相殃及排喺前面嘅漁業貸款，無啦啦連累一班等住筆貸款救命嘅漁民。
話說財委會主席張宇人（Tommy）尋日話，由於大會之前通過嘅決議案列明喺一四／一五年度內成立創科局，如果財委會唔可以喺二月十四日、即情人節之前通過成立創科局嘅撥款申請，二十五日發表嘅財政預算案就唔可以包括創科局新加嘅財政預算，換言之創科局所有程序都要從頭開始。
張宇人話作合理限制
Tommy話，由於成立創科局呢個議題已經喺大會同人事編制小組委員會傾過好多次，加上佢認為創科局嘅迫切性同話題性都唔及三堆一爐，覺得委員會應該唔使討論太耐就可以表決。對於有泛民主派議員表明「拉布」，Tommy就話佢會容許議員就議題合理地發問，但唔可以畀人覺得立法會議而不決，所以會視乎情況作出合理限制。
人民力量陳志全（慢必）批評當局臨時抽起財委會部分議程嘅做法卑鄙奸茅，表明到時一定會以提休會待續同不斷發問等方式「拉布」。對於財委會將會喺二月頭同情人節當日加開四節會議，慢必就話為咗拖長「拉布」時間，佢哋會同泛民其他黨派合作，喺審議漁業貸款撥款申請時開始「拉布」，等財委會遲遲都唔可以進入審議創科局嘅議程，等政府唔可以「快刀斬亂麻」通過創科局撥款。
業界團體明立會示威
漁農界何俊賢（高佬賢）話，為咗協助受禁止拖網捕魚影響嘅漁民，政府早前建議將漁業貸款由二億九千萬元加碼至十一億元。但由於財委會「拉布」拉足半年，已令一班諗住獲政府打救嘅漁民非常不滿，點知依家泛民又因為一己私利而想拖垮漁業貸款，認真離譜。高佬賢話，唔少漁民團體明日會趁財委會開會到場示威，呼籲泛民議員高抬貴手，冤有頭債有主，唔好搵業界利益嚟較飛。