「生仔也好，生女也好，兩個已經夠晒數。」呢個提倡節育嘅家計會廣告，以前幾乎無人不曉，不過隨住時代轉變，呢首歌已經成為集體回憶咯。今時今日嘅香港，人口老化問題嚴重，港府唔係擔心市民生得太多，而係擔心生得太少，所以咯喎，新一份施政報告扭盡六壬，鼓勵生育，都算係用心良苦囉。
特首梁振英尋日發表任內第三份施政報告，除咗房屋、青年政策及扶貧等備受關注之外，鼓勵生育亦係其中一個新亮點。施政報告係咁講嘅，為應付人口老化帶來嘅新挑戰，當局將締造有利生育環境，包括檢視薪俸稅子女免稅額、研究落實十五年免費教育、改善家庭友善僱傭政策，以及由一五至一六年度起逐步增加幼兒中心及幼稚園嘅延長時間服務資助名額至六千二百個等等。簡單嚟講，即係採取銀彈政策，由小朋友出世、讀書到託兒服務都有補貼，減輕父母負擔。
即係咁，生兒育女，在在需財，有補助梗係好過冇補助喇。正如理財廣告話齋，培養一個兒童成才需要四百萬元，雖然未必人人認同，但香港養兒育女開支龐大，係不爭嘅事實，尤其係幼稚園學費，仲貴過讀大學，唔少家長節衣縮食亦要頂硬上，當中嘅難處同辛酸，簡直不足為外人道。最不知所謂嘅係，當年貪曾叫人生三個，但只係得把口，乜配套措施都冇，反而不斷放內地孕婦來港產子，造成雙非問題，搞到七國咁亂，簡直靠害。現屆政府撥亂反正，推出措施鼓勵生育，總算踏出第一步。
之不過咁，養兒育女除咗要考慮經濟能力，仲要顧及好多範疇o架。就講房屋問題吖，港府覓地建屋慢過龜爬，樓價租金高與天齊，搞到好多市民望樓興嘆，就算唔使住劏房，居住環境都唔好得幾多，好多家庭連BB床都放唔落，仲邊敢生吖。仲有吖，教育制度一塌糊塗，唔止學生受苦，家長一樣受害，喺咁嘅情況下，鼓勵節育就差唔多！
咁講喇，生兒育女係人生大事，港府鼓勵生育唔係話唔得，最緊要配套措施，尤其係今時今日衣食住行樣樣難，當局只係提供減稅等小恩小惠係唔夠嘅。古人話，養兒一百歲，長憂九十九。如果港府唔想辦法改善施政，解決房屋、教育及醫療等重大民生問題，鼓勵生育等於緣木求魚嘅咋。
講到底，人口老化愈嚟愈嚴重，問題根源就係出生率低，而要提高出生率，必須持之以恒，多管齊下，唔係講完就算o架！