我哋早前報道過，有網民表明有意參加年底舉行嘅區議會選舉，挑戰多年都係來自動當選嘅建制派區議員。據聞呢班網民初步揀定東區、深水埗及黃大仙作為參選試點，仲講到明要狙擊因為反佔中而揚名嘅佔中律師、民建聯（民記）黃大仙區議員陳曼琪，令佢唔可以輕鬆自動當選。
當佔領行動爆發後，陳曼琪代表潮聯小巴公司入稟向法庭申請旺角禁制令，要求重開旺角彌敦道一帶道路，之後又代表小巴公司聯同執達主任去旺角宣讀禁制令，一舉一動令佢迅速成為建制派風頭躉。不過，樹大招風，加上佢多年喺黃大仙正愛選區自動當選，於是成為網民嘅狙擊目標，如果地區工作唔實淨，分分鐘輸埋個議席。
班網民為咗低調行事，加上唔想同任何政黨拉上關係，最近成立名為「慈雲山建設力量」嘅地區組織，仲不時派義工落區派單張宣傳。由於佢哋資源同人手都不及一般政黨，據聞佢哋決定用民生議題攻擊陳曼琪，例如民記○七年喺立法會通過公屋加租法例，佢哋就製作一批宣傳單張，寸爆民記「扮嘢」反對加租係無恥，希望藉此攻擊陳曼琪，睇嚟陳曼琪今次選舉都唔可以輕輕鬆鬆連任喇。