政情：泛民議員 白(逗)人工

因應政改爭議同較早前嘅佔領行動，泛民喺議會內發起不合作運動，除咗杯葛政改第二輪諮詢，亦會全力阻撓民生議題外嘅撥款申請，企圖拖垮政府施政。所以一班泛民議員每日喺議會內做嘅嘢離不開「拉布」、杯葛，一唔鍾意就拉隊離場。講到開會玩嘢嘅激進議員，「鼻祖」一定係社民連梁國雄（長毛），基本上掟嘢咩都掟齊，點知佢尋日因為要上庭而缺席會議，做騷重任於是落在人民力量陳志全（慢必）及陳偉業（大舊）身上。

無視民生議題

不過，自上星期政改三人組到立法會宣布展開政改第二輪諮詢，其他泛民議員都加入做騷行列，繼上星期擔黃傘拉隊離場後，又喺尋日特首宣讀施政報告時重施故技，今次擔黃傘之餘，仲好似長毛抬棺材扶靈咁，扶住兩大條直幡離場，之後交代幾句就收工喇。眼見其他泛民加入玩嘢行列，大舊同慢必都要等到其他泛民走晒，先輪到自己「開拖」，同保安拉拉扯扯，捱咗十幾分鐘終於被人抬離場，宣告收工。

其實施政報告唔單止關乎政制，仲牽涉各項民生議題，佢哋為咗政改咁玩法，似乎同當初發起不合作運動嘅原意背道而馳。立法會議員未計三萬多元醫療津貼，淨係人工已經接近九萬元，人工高福利好，依家嗌兩嗌就收工唔使做添，唔怪得每次選舉都爭崩頭啦！唔知今日特首答問大會，同埋初七公布財政預算案時，班泛民會唔會重施故技，一開波就收工，白(才豆)人工呢？