中環出更：發叔見CY 即刻除黃呔
每逢官員到立法會宣讀施政報告或財政預算案，在場一眾議員總有人瞌眼瞓。尋日好多議員唔夠半個鐘就去搵周公，反而全場最老嘅議員劉皇發無瞓覺，但佢就唔小心帶咗條代表撐佔領行動嘅鮮黃色嘅呔，唔多政治正確。不過，好彩佢好快醒覺，一見特首入場就即刻閃電式除呔，扮晒無事發生咁，真係薑愈老愈辣。
張宇人睇細路相
話說飲食界張宇人同工聯會黃國健（KK）頻頻搵周公，KK仲要黨友鄧家彪拍醒佢。至於張宇人瞓一陣就醒咗玩手機，但佢唔係睇新聞亦唔係睇股票，而係睇緊啲小朋友相，唔通係佢啲乖孫？其實主席曾鈺成都好體諒班議員，首次喺中途特設五分鐘小休，點知五分鐘過去，好幾位議員如好眼瞓嘅KK、鍾樹根、地產建造界石禮謙、航運交通界易志明都唔見影，足足消失咗十幾分鐘至歸位。
咁多位建制派議員中，只得新民黨主席葉劉淑儀缺席，據聞佢前日突然有要事飛去北京，施政報告宣讀前突然去北京，令人有好多聯想，莫非要同重要人物密會？
卓妮