中環出更：華哥退5登 6名人齊賀
香港鐘表業總會前主席梁青華（華哥）早前喺喜運佳鐘錶榮休，近期正密鑼緊鼓自立門戶開新錶行。早幾日佢廣邀城中老友出席其「退伍登陸之夜」，唔講仲以為佢打算進軍大陸市場，實情係慶祝佢六十歲生日，即係告別五字頭、邁向六字頭咁解。一眾鐘錶界猛人包括總會永遠榮譽會長孫秉樞、前主席區宇凡及黃業光等人齊去歡聚，氣氛好熱鬧。
香港菁英會前主席洪為民（Witman）都有到場，仲夾份送咗好得意嘅軍裝公仔做賀禮。原來佢同華哥相識十幾年，現時Witman係交通安全會主席，華哥係副主席。講起交通安全。
Witman話，香港宣傳道路安全五十年，依家無論司機或行人過馬路都唔會亂嚟，近年內地都來港取經添！
姚新景過契做囝囝
同場仲有著名粵劇及武術演員關德興嘅孫仔關照洋，佢係華哥嘅契仔，啱啱由夏威夷返港探親兼度假。講番晚宴另一高潮，就係華哥又收多一名契仔及契女，其中契仔係博愛醫院副主席吳錦青嘅女婿姚新景（James），James太太吳嘉瑩（Alyssa）及外母黃海燕都去見證開心時刻。
黃海燕笑笑口話，佢一家人同華哥係舊相識，三年前James結婚後先至識華哥，估唔到兩人好投契，無所不談，James同自己爸爸都冇咁多嘢講喎！James就話，佢建議不如兩人做結拜兄弟，但華哥話唔得，事關佢睇住Alyssa大，梗係做契父子至啱啦！
卓妮