左三年，右三年，公義未伸恨綿綿……大家唔好誤會，功夫茶唔係唱懷舊歌曲，而係講緊貪曾案，前特首曾蔭權爵士因為爆出連串貪腐醜聞而被廉署立案調查，唔經唔覺已經接近三年，至今仍未曾落鑊，你話係咪匪夷所思吖？
嗱，等功夫茶同大家重溫呢宗香江第一貪案。話說一二年二月，東方報業集團獨家踢爆貪曾連串「貪遍省港澳、歎盡海陸空」醜聞，轟動全城，廉署其後正式立案調查，點知一查就查咗三年，案件至今石沉大海，無影無蹤。冇錯，貪曾貪婪成性，貪腐醜聞好似水蛇春咁長，需時調查，不過咁喎，佢嘅醜行全部罪證確鑿，請佢飲咖啡毫無難度，廉署查咗三年都冇結論，唔通反腐利劍已經生銹？定係官官相護呢？
唔係亂噏o架，近日有消息傳出，鑑於本港政局立立亂，一舉一動都受到全世界注意，當局為免亂上加亂，極可能放生貪曾咁話。有冇搞錯吖，貪曾以權謀私，官商勾結，鐵證如山，影響惡劣，如果咁都可以網開一面，豈不是話畀人聽，只要官位夠高，後台夠硬，就可以為所欲為，就算斷正都冇事？咁搞法，本港廉政同法治招牌想唔畀人當柴燒都唔得喇。
計功夫茶話齋，正正因為香港政局不穩，當局先至要依法辦事，重建法治，挽回港人信心。學北大人話齋，反腐不封頂，不論官階幾高，貢獻幾大，犯法就係犯法，貪腐就要懲處。冇錯嘞，咁至係治國之道吖嘛。可以咁講，如果貪曾被放生，逍遙法外，香港想唔玩完都幾難吖！
事實再次證明，香港話就話係法治之區，法律面前人人平等，實際上係虛有其表，自欺欺人。大家應該仲記得，當年港府檢控帶住「金鷹」賣藥多年嘅九旬老翁陳伯，行動迅速，絕不手軟；而控告中環擦鞋匠李伯阻街，又係毫不留情。反而面對世紀貪案，居然軟手軟腳，一拖再拖，咁唔係雙重標準又係乜吖。
正所謂，物必先腐而後蟲生，人必自侮而後人侮之。本港廉潔排名節節後退，歸根究柢，禍源就係當局懲貪不力，外界對香港廉政咪信心盡失囉。呢，日前有調查顯示，本港六成五青年認為香港貪污問題愈來愈嚴重，比率較○七年大幅飆升超過兩倍，問你驚未。
一句講晒，貪曾醜聞已三年，痛打蒼蠅莫遲疑。等功夫茶提醒廉署，調查貪曾之餘，唔好忘記仲有一個「茅台換政協」嘅前廉政專員湯顯明吖！