政情：公民講場：「成」讚新鐵欄文明又先進

上星期三立法會示威區換咗批新鐵欄，唔知大家有無試過行近個鐵欄睇吓呢？新鐵欄近睇有一個個整齊嘅細窿，十足十平日屋企廚房嘅食物刨或刨絲器咁款！雖然新鐵欄面世以來不斷被惡搞，唔單止被嘲笑似月台幕門，又被人話係蘿蔔刨、辣椒刨，但立法會主席曾鈺成仍然覺得個新鐵欄設計幾好，仲話呢批新鐵欄經過改良，外觀睇落較為文明同先進，亦都較為安全，唔似舊鐵欄咁容易被人拆出來做攻擊性武器喎。