政情：新構思直選區議員提委
政改進入第二輪諮詢，但仍然維持僵局，泛民主派堅持杯葛，中間溫和派亦唔見有拋出好提議。有建制派人士最近醞釀一個新方案，就係開放提名委員會（提委會）選民資格，容許全港選民喺第四界別中嘅「港九各區議會」、「新界各區議會」投票，令提委會選民基礎擴闊至幾百萬。不過，泛民現時講咩都聽唔入耳，就算政府同中央肯接納，泛民都係照樣否決，提議點好都睇怕只係煲無米粥。
唔忍心政改被否決
眾所周知，一千二百名提委會成員由四大界別組成，而第四界別屬於「政界」，由立法會議員、政協、人大、鄉議局、宗教界及全港區議員共同組成，而當中一百二十多席由區議會組成，但可惜現時只由區議員互選產生，民意認受性令人質疑。
目前大部分建制派人士都無新建議，只係批評泛民堅決否決政改方案，有建制派人士眼見咁落去，唔忍心眼白白睇住政改被否決，所以建議容許全港選民選出百多名區議員做提委會成員，等提委會選民基礎大增，增加提委會認受性。
事實上，呢個方案唔算係「公民提名」，亦符合人大常委會八三一決定及《基本法》，法理上係完全無問題，而且仲令到提委會符合「廣泛代表性」。不過，倡議者只係擔心，現時有無足夠「政治空間」去容納呢個方案。
據聞呢個方案係一群人集體智慧諗出來，但為免方案「見光死」，佢哋無大鑼大鼓周圍同人講，只係低調同政府提交咗呢個新方案，政府聽到後都覺得有新意，但由於之前無乜人從呢個方向提出過，政府一時之間都唔敢否定或肯定，只係一貫回應話可以研究。
恐傾傾吓淪無米粥
講到底，任何方案唔係要過政府嗰關，而係過北京嗰關，但北京似乎未到最後關頭，都唔會作出任何定奪。就算北京首肯，都要泛民肯「顧全大局」支持方案，如果下下都要一步到位，等於傾乜都無用，最後淪為無米粥。睇怕要過多幾個月，去到最後埋枱談判階段，先知呢個方案有冇機會落實。