中環出更：「拉布」阻11議員入「工務」
泛民主派喺議會搞不合作運動，成功取得立法會工務小組及人事編制兩個小組委員會控制權，建制派原本打算申請逾期加入補飛，點知就被泛民玩到陀陀令。其中工務小組，連埋尋日合共開咗三次特別會議，都未處理晒十二位建制派議員嘅逾期加入申請，只批准早前曾到小組解釋嘅議員謝偉俊申請，實行拖字訣玩「拉布」。
搵藉口加開特會
由於新加入小組嘅議員即時有投票權，可影響隨後加入嘅議員申請。泛民議員范國威就建議，應該喺表決晒所有逾期加入申請後，逾期加入小組嘅議員先享有表決權，唔想放生建制派。不過，佢嘅建議就連泛民都唔撐，覺得應該跟番一貫嘅做法，但泛民就認為要再次通知其餘十一位議員，畀機會佢哋再到小組解釋喎。
其實小組一旦否決建制派嘅申請，建制派就可以直接去財務委員會「上訴」。泛民再三搵藉口要求加開特別會議討論，只係想拖得幾耐得幾耐，難怪有建制派小組委員批評泛民以程序公義為名，實際上就係「拉布」為實，浪費時間，浪費埋納稅人金錢。
卓妮