內地官網有個說法：國家領導人可以通過「進廚房、掀鍋蓋」的方式，了解百姓生活嘅真實狀況，以此體現對民生嘅關注。
如此體察民生，總比「隨口噏，當秘笈」要紮實。《共和國風雨中的毛澤東與周恩來》一書，有一段記載在大躍進時期，周恩來也有過「掀鍋蓋」的經歷。當時，周恩來突擊檢查農村大食堂，掀開鍋蓋一看，裏面還剩下些玉米糊糊，又在農民家中看了幾次鍋裏的東西，終於確信：「真的沒糧食啊！」
你看，內地嘅領導人體察民生、民情，畢竟還是要到民間接觸老百姓，掀一下鍋蓋；可是，香港一眾高官，像人稱「鬍鬚曾」嘅財爺，下月二十五日、即正月初七「人日」就要公布新一份財政預算案，呢位守財奴固然年年大喊十估錯數，明明庫房水浸，佢都要廢噏無謂，一時話要「應使得使」，一時話要「審慎理財」……總之，政府窮得只剩下錢，管他民生是否多艱，叫佢派錢惠及大眾仲慘過割佢忽肉。
最近守財奴忽然轉死性，又喺佢網誌放風話未來三個財政年度應可「年年有餘」，正當市民紛紛以為政府咁審慎理財，年年有盈喜，咁開水喉、派糖惠及民生肯定有望喇，何況會計師公會預料本年度港府財政盈餘為六百億元，遠多於鬍鬚曾所估計嘅九十一億元。喺咁嘅情況下，政府再唔體恤民艱，一次性紓困如電費津貼好心唔好Cut咗佢，須知夏日炎炎啲電費動輒過千，畀幾舊水津貼吓市民好應該啫！至於綜援戶雙糧、傷殘津貼加倍、退稅給中產、租金扣稅亦應有之義！
政府肥到着唔到襪，而民間基層、中層怨聲不絕，鬍鬚曾唔好連「掀鍋蓋」都唔做就廢噏一大輪，未來三年「年年有餘」，今年開倉人人派住一萬大元先，唔好失禮畀濠江也！