專業人士從政，向來有利有弊。利當然係能夠運用專業知識同人際網絡發揮優勢，弊就係議會工作太困身，隨時要犧牲事業發展時間，搵少好多錢。好似自由黨（富貴黨）咁，黨內不乏年輕專業人士，醫生、律師、工程師數埋都一大堆，但今年底區議會選舉，就最少有兩位醫生打退堂鼓，希望專注事業。睇嚟該黨要吸引呢班專業人士參選，銀彈政策未必奏效，攻心先係上策。
該黨兩位黨員本身都係眼科醫生，其中一位係灣仔區議會委任議員龐朝輝（Jeffrey），本來該黨有意派Jeffrey出戰灣仔渣甸山選區，諗住以佢專業醫生形象，可以贏到一班中產區選民歡心。可惜最近已唔見佢落區，而且已經另派一位黨友出戰。另一位眼科醫生劉啟傑（Vincent），上屆區議會選舉挑戰民主黨油尖旺區議員涂謹申都只係輸少少，但佢都決定唔再捲土重來嘞。
據聞Jeffrey同Vincent近年專注私人執業，可以話係全職搏殺搵真銀。兩位人士喺黨內都有「月球人」稱號，即係每月賺近一球（一百萬元），實情未必有咁多，但月入六位數字就一定無走雞。有人仲要經常返某名牌私家醫院掛單，試問點會有時間做地區工作？所以有傳兩人寧願棄戰直選。