政情:袁振寧呻旅行社生意難做

日圓貶值令港人遊日興致勃勃,斷估旅行社生意應該唔錯,但早前我哋喺一個活動上見到縱橫遊執行董事袁振寧(CN),佢就呻話生意難做,事關網上銷售平台當道,加上廉價航空機位不停增加,令業界經營利潤愈來愈薄,實情係「有人頭冇饅頭」至真喎!

CN話,過往旅行社可以喺旅遊淡季時賺少啲,旺季時賺多啲拉上補下,但今時今日嘅遊戲規則已經唔同晒。現時銷售機票及酒店嘅網上平台愈來愈多,令到價格好透明,競爭激烈,對傳統旅行社業務影響好大。

「惟有做大個餅」

咁仲未夠,廉價航空嘅興起對業界衝擊亦好大,因為市民可以直接同航空公司買機票,唔使再經旅行社;加上廉航機位不斷增加,以日本線為例,過去一年廉航機位數目勁增四倍。講到咁慘,CN話未來惟有積極開拓大陸客市場,希望將個餅做大啲望有肉食喎。

第一手消息請下載on.cc東網iPhone/iPad/Android/Windows Phone Apps