政情：公民袋摺得
公民黨（公文袋）喺立法會內坐擁六席，票數話多唔多，話少唔少，但部分黨員近年大玩「個人主義」，各自為政，貌合神離早已係公開秘密。警方最近就佔領行動展開第二波拘捕行動，被指係佔中搞手嘅黨魁梁家傑（袋巾傑）、「大內總管」陳家洛及立法會前議員陳淑莊（Tanya）都係首輪拘捕名單之中，分分鐘要坐監；加上該黨內部就政改產生分歧，湯家驊、郭家麒等較溫和嘅成員已同黨漸行漸遠，睇嚟公文袋短期內將面臨瓦解危機。
一場佔領行動，令公文袋分裂情況愈演愈烈。好似袋巾傑、陳家洛及Tanya咁，早前已接獲警方通知，有可能以煽動及組織非法集會等罪名拘捕佢哋，其中Tanya尋日下午已經正式被警方拘捕。如果告得入上述罪名，幾位公文袋骨幹成員隨時坐監，原本被視為該黨接班人嘅Tanya，重返立法會嘅願望亦隨時落空。唔單止咁，有傳公文袋主席余若薇會出現喺第二輪拘捕名單上，即係一眾黨員唔係等拉就係可能等坐監。
死敵白鴿黨最樂見
除咗佔領行動加劇分歧，政改亦令該黨之間嘅分歧進一步浮面，好似郭家麒、湯家驊同郭榮鏗三人過往喺上海政改之行各走各路，已足見黨內毫無隊形可言；而早前泛民主派撐佔領行動，郭、湯二人更全程失蹤，某程度上已經表明取態。較遲入黨嘅郭家麒為保新界西選區票倉，更只埋首新界區議題，儼如「獨孤城」。至於唯一女將毛孟靜，早已盛傳同陳家洛冇偈傾，近年更改行「本土」路線，唔講仲以為新民主同盟范國威先係佢黨友。
不過，最樂見公文袋分裂或瓦解嘅，相信莫過於民主黨（白鴿黨）。白鴿黨喺佔領期間進退失據，行得太前就被人鬧激進，又因為絕迹金鐘，又冇參與佔中三子同學聯等會面而被人鬧爆。不過，隨着公文袋、工黨等主要死敵黨員陸續被拉，冇核心人物參與佔領嘅白鴿黨有望執死雞，坐享漁人之利。