政情：中環出更：方文雄勸青少儲錢等跌市
青年人個個都話樓價貴難買樓，從事地產及收租嘅老手又點睇呢？協成行集團董事總經理方文雄（David）日前出席聯合國兒童基金活動時話，現時買唔到樓嘅年輕人唔使心急，呢段時間應該先儲定錢，唔好因為樓價高不可攀就將啲錢亂咁使，否則樓市起起跌跌，一到有機會嘅時候，就只得個睇字，幾時都應該要居安思危咁話。意旨人要等機會，但機會絕對唔會等人。
聯合國兒童基金香港委員會日前舉行第八屆「小畫家大夢想繪畫比賽」，近二千名十二歲以下兒童齊集維園中央草坪，繪畫心中「理想國度」，籌款資助貧困地區孕婦到醫院進行產前產後檢查及住院分娩。委員會主席陳晴（Judy）及籌委會委員David等一早就去到現場，觀賞小朋友繪畫情況。David經過「紅封包義賣籌款」攤位時，仲自掏腰包買咗十包利是封，身體力行支持活動。
陳晴抄經 心境平靜
卓妮見David好認真睇小朋友繪畫，原來佢話不時會去大會堂或上環荷里活道畫廊睇畫。事關佢覺得香港人生活節奏同步伐咁急促，好難得可以有靜落來思考嘅空間，如果有一幅畫作可以喺鬧市中吸引途人停低駐足觀賞嘅話，咁就肯定係一幅唔錯嘅作品喎。
至於Judy及副主席孔美琪（Maggie）就笑言繪畫唔算叻，Judy話自己細個其實根本就唔識分有咩興趣或喜好，全靠屋企人逼佢學習。而佢現時就鍾意抄經，因可令心境平靜。Maggie則透露，小學五年級時，老師已經問佢「點解你揀繪畫班唔揀唱歌呀？」暗示佢強項唔係繪畫方面。
同場仲有支持活動嘅周大福珠寶集團董事總經理黃紹基，佢話以前未普及用電腦繪圖時，佢不時手繪畀客睇，就係因為咁先加入咗珠寶行業，但佢話最拿手係畫人像喎。
卓妮