古人教落︰政之所興在順民心，政之所廢在逆民心。意思好簡單，為政者最緊要順應民意，否則，一定冇運行。嗱，新一份施政報告下個禮拜三出爐，港府究竟係順民心抑或逆民心，好快就揭曉。
同往年一樣，唔少團體把握機會，喺施政報告公布前表達訴求。有基層關注組織促請港府提供資助同銷售渠道，協助有創意嘅青少年向上流動；有團體要求港府盡快落實全民退休保障計劃；亦有長者去禮賓府請願，要求港府增加樓宇維修資助。雖然訴求唔同，但全部關乎民生，唔到當局唔重視。
正所謂，年年歲歲花相似。港府年年發表施政報告，市民就年年請願，幾乎已經係指定動作，不過今年情況有啲唔同，佔領鬧劇啱啱結束，經濟民生大受打擊，社會撕裂，矛盾加劇，港府如果掉以輕心，分分鐘進一步激發民怨，唔係講玩o架。
當然，港府亦睇到呢啲問題，知道危機所在，所以計劃推出補鑊措施喎。尤其係針對青年問題，將成為今年施政報告其中一個重頭戲。例如計劃成立創業基金，資助年輕人創業；又例如針對青年人住屋問題，計劃豐富資助置業模式，包括將部分新落成嘅公屋改為居屋，賣畀綠表申請人。
即係咁，遲到好過冇到，呢啲計劃作為補鑊措施，原意係唔錯嘅，但成效究竟有幾大，仲要睇過至知。特別係青年創業基金，有人擔心本港營商成本高企，年輕人又欠缺經驗，分分鐘創業不成而孭到周身債，弄巧反拙。至於向綠表人士出售公屋，只係涉及一千五百個單位，相對於龐大嘅住屋需求，連杯水車薪都不如喎。
話時話，以今日港府嘅財力，要幫助青年人唔係咁難，問題係肯唔肯承擔啫。呢，有會計師行估計今個財政年度港府將有近六百億元盈餘，比財政司司長曾俊華原先估算嘅九十一億元高出一大截。可惜吖，鬍鬚曾一味重彈舊調，一時話要審慎理財，一時話七年後可能出現結構性財赤，擺明想卸責。好似舊年咁，施政報告大手筆扶貧，點知鬍鬚曾嘅預算案就閂水喉兼「減甜」，今年會唔會重演呢一幕，好難唔令人擔心囉。
點講都好喇，家陣深層次矛盾已經到達臨界點，施政報告及預算案有冇料到，全港市民睇到實，港府好自為之啦！