近年社交媒體興起，政府經常被指唔夠貼近網上意見。據聞特首辦早前就邀請司局長、副局長及政治助理、常秘以至行政會議成員，出席尋日舉行嘅「如何善用社交網絡」工作坊，有成三十至四十人到場，包括勞工及福利局局長張建宗、成日用社交網站嘅商務及經濟發展局局長蘇錦樑、行會召集人林煥光等。據聞特首在開場白話，希望政府開拓社交網絡，盡量聯繫年輕人，爭取話語權及帶領輿論。
之後就由科技公司代表分析社交網絡現況，認為網媒反應好快，貼近社會趨勢，搶到話語權。代表又話，網上要有血有肉交流，先至令網民有迴響，仲話發展局局長陳茂波拍片放上網，問唔發展新界東北、年輕人結婚點算係好例子。代表提及台北市新任市長柯文哲競選期間，面對抹黑，都用社交網絡試吓水溫，之後先開記者會解釋。佢哋結論係現時網上都係要用圖或短文，言簡意賅帶出準確訊息。
另外，佢哋又提及要善用「重要意見領袖（key opinion leader）」，其中演藝界就有「左麟右李」歌手李克勤和譚詠麟。相信係佢哋講一句，好過政府講十句，年輕人較易入耳。