政情：鬍鬚曾扮盈要補鑊

人日「派糖」凍過水

不過，唔知鬍鬚曾係咪自知講大咗，曾近日再轉吹淡風，重施故技引用長遠財政計劃工作小組報告，恫嚇市民「結構性財赤」隨時殺到。鬍鬚曾想使錢時就年年有餘，想閂水喉就預計有財赤，睇嚟初七「人日」想人人有糖派認真凍過水喇。

鬍鬚曾尋日出席中華總商會午餐會，繼續為市民做好期望管理，甫開始即以近十分鐘時間「瞬間看地球」，力數歐債危機、地緣政治風險增加，全球各國經濟都對香港產生負面影響。好嘞，返番嚟香港，鬍鬚曾又指佔領行動及政改爭議影響香港中長期經濟，期望市民唔好再喺沒完沒了、冇人得益嘅爭拗上糾纏。

只識儲錢 唔願使錢

不過，台下中總會員唔係三歲細路仔，有會員趁問答環節透過主持人當面篤爆鬍鬚曾，質疑佢放風稱未來三年「年年有餘」係咪有違審慎理財原則。鬍鬚曾即時將上月嘅補鑊網誌再背誦一次，講明下年度轉虧為盈只係醫療融資開支減少所得嘅意外之財，長遠財政計劃工作小組仍然預示香港有財赤危機！

其實鬍鬚曾年年係咁儲錢但又唔捨得使錢，有錢剩就巧立名目設房屋儲備金，猶如將零頭放入第二個夾萬再儲一筆，財爺呢份工真係容易做。唯一新猷似乎只係有具體措施，支援受佔領行動影響嘅商戶。至於有乜嘢措施，鬍鬚曾着大家等吓，等到「下個月」，即係喺預算案公布，意味只係一次性措施而非長遠政策囉。