中環出更：象哥木筷製「投票神棍」
立法會財務委員會尋日繼續審議興建石鼓洲焚化爐嘅撥款申請，正當一眾建制派議員猛呻又要留喺會議室不斷撳掣投票時，進出口界議員黃定光（象哥）就倣效時下好流行嘅「自拍神棍」，用木筷子自製一支「投票神棍」，每當投票時就唔使俯身向前撳掣，避免整傷條腰骨。
稱午飯時靈機一觸
象哥話，中午食飯時見到枱上有一對木筷子，諗起下午又要坐定定投票，於是心生一計，用膠紙將兩支筷子黐埋駁長製成「投票神棍」，只要用支棍一篤枱頭個掣就可以投到票。唔少建制派議員都大讚象哥支「投票神棍」好實用，但就要小心手震，萬一撳錯隔籬個掣就大鑊喇。
金融界吳亮星就笑笑口話，泛民主派有「政棍」，建制派就有「神棍」，莫非佢想泛民同建制兩邊都寸勻？不過，最搞笑係議員李慧琼借咗象哥支棍嚟用，但支棍黐得唔堅固，搞到篤極都篤唔到個投票掣，最後笑笑口還返支棍畀象哥。撳掣投票都咁艱難，睇嚟秘書處要引入搖控投票系統至得喇！
卓妮