中環出更：廠商會換屆 薪火相傳
新一年又係唔少商會或機構換屆嘅時候，香港中華廠商聯合會（廠商會）前日就假灣仔會展舉行新一屆會董就職禮，一班會董及成員悉心打扮赴會。接替施榮懷新任會長李秀恒（Eddy），特別在場內擺設兩部自拍相機畀所有來賓於酒會期間玩自拍，嘉賓進場時仲有鼓手敲擊會閃彩色燈嘅透明鼓，新穎得嚟有氣勢，氣氛非常熱鬧。
Eddy話，部分場內裝飾擺設係同事構思，希望增添更多年輕活力元素，佢入場時都被其他成員捉咗去玩自拍，一班青委成員亦齊齊戴上眼鏡及鬍鬚等道具合照，不亦樂乎。至於有會董向成員送贈三款顏色嘅煲呔，Eddy就話送煲呔係因為方便有時大家帶出街，隨時夾上恤衫使用，又可以當多個選擇襯衫替換吓喎。新煲呔沿用舊有布料款式，可以「繼承舊傳統，開創新意念」咁話。
至於今屆兩位新副會長史立德（Allen）及戴澤良則成晚滿場飛忙於招呼嘉賓。見戴澤良太太羅台秦一身長裙在人群中搶眼奪目，但佢就笑言要在場內四圍搵番「失散」嘅老公好困難喎。Allen太太史顏景蓮則穿上一條設計師度身訂造的粉紅色中式晚裝上台參與演出，大方得體，盡顯女性優美體態。
Eddy接替施榮懷
Eddy喺就任致詞時就感謝上屆會董嘅努力，特別係前會長施榮懷嘅貢獻致衷心感謝。之後兩人互相擁抱，Eddy並在施榮懷手上接過火炬，正式為廠商會新會長，象徵薪火相傳。
卓妮