年年預算年年失算，對於財政司司長曾俊華嚟講，估錯數早就唔係新聞，如果唔係，佢嘅算術都唔會畀人話只有小學程度喇。所以咯喎，今個財政年度雖然未完，但睇嚟都係離題萬丈嘅喇。
呢，會計師公會預料本年度港府財政盈餘為六百億元，足足係鬍鬚曾所估計九十一億元嘅六倍幾，有間會計師行就保守啲，預料盈餘五百八十一億元，同樣遠遠高過鬍鬚曾嘅數字，你話佢係咪小學雞吖？財政盈餘大增，據講係利得稅同印花稅收入遠超預期喎。
即係咁，呢個財政年度仍未結束，具體數字仲要等下個月發表嘅預算案至知，但有一點可以肯定嘅係，港府豬籠入水，庫房就快水浸嘞。大家有眼見，一向鍾意玩「狼來了」嘅鬍鬚曾最近突然轉性，聲稱未來三年「年年有餘」，其中下個財政年度更加由虧轉盈添。
依家嘅問題係，既然盈餘遠超預期，鬍鬚曾究竟點樣分配呢筆意外之財呢？係人都知，本港經濟民生問題千頭萬緒，基層市民度日如年，照計港府應該善用盈餘，一方面扶貧紓困，一方面謀劃長遠。弊在鬍鬚曾守財奴死性不改，一味強調儲備多多益善，甚至不斷以七年後可能出現結構性財赤恐嚇市民，講嚟講去，無非都係想推卸責任。嗱，上個財政年度港府錄得二百幾億元盈餘，點知預算案居然「減甜」，取消多項一次性紓困措施，搞到天怒人怨，今年盈餘大增，如果鬍鬚曾繼續一毛不拔，盞進一步激起民怨咋。
港府開口埋口「審慎理財」、「量入為出」，實際上係「孤寒理財」、「有入無出」。正如有人話齋，公共理財唔同私人企業，應慳則慳，應使則使，唔係話儲備愈多愈好嘅，鬍鬚曾連咁顯淺嘅道理都唔明，唔怪得被封為「史上最廢財爺」喇。
講開又講，港產官僚敷衍塞責，得過且過，旨意佢哋謀劃長遠，解決深層次問題，等於緣木求魚，不如慳番啖氣好過。所以呢，講多無謂，行動最實際，與其吹水唔抹嘴，不如開倉派錢，還富於民。冇錯，派錢唔可以解決貧富懸殊，但總好過乜都冇。港府一向善財難捨，冤枉甘心，淨係基建超支都唔知浪費幾多公帑，與其係咁，不如派畀市民好過，就算派粒糖，都可以甜一甜吖，係咪。
古人就講得啱嘞，治國之道，富民為始。好多國家債台高築，政府就話無能為力啫，但香港係富裕社會，港府肥到着唔到襪，貧富懸殊居然冠絕全球，點講都唔通喇。咪話功夫茶唔提醒吖，家陣社會矛盾惡化，民怨沸騰，如果下月發表嘅預算案又係冇料到，鬍鬚曾你自己搵窿捐喇！