我哋早前報道過網上有班「鍵盤戰士」正密謀喺年底區議會選舉，向全港自動當選嘅建制派或「偽獨立」議員挑機，增加佢哋嘅連任成本。不過，唔好以為建制派先知驚，有溫和泛民主派政黨擔心呢批「戰士」講就天下無敵，結果偷雞唔到蝕把米，反要泛民收拾殘局，令未來區選打勝仗更添難度。
有多年區選經驗嘅溫和泛民成員提出一套選戰理論，認為選民都傾向「慣性投票」，意指今屆選擇投畀候選人Ａ，下屆都傾向投番畀同一人。因為選民決定投票畀「對家」，要考慮對方有咩好得過候選人Ａ，但按習慣繼續投畀Ａ就唔使諗咁多，抉擇機會較低。因此多個區都會出現區議員冧莊多屆嘅情況。
假如網民只係「柴娃娃」參選而冇實際政綱，變相逼使冇投票習慣嘅選民出面谷票，反而推高建制派得票率。若果網民敗陣而根本無意再花四年落區深耕再戰嘅話，建制派來屆參選嘅基本盤就係去屆嘅得票結果，泛民再要接力落區挑機就難上加難。難怪呢位泛民中人奉勸網民若要挑機，至少穩操多少勝券先至出戰，否則選擇純粹落區宣傳泛民理念，會更方便快捷。