政情：林健鋒父子 唱好家鄉南海
立法會商界議員林健鋒（Jeffrey）同身兼菁英會副主席嘅兒子林凱章（Victor），經常都返家鄉佛山南海，主要打理當地嘅玩具廠房，所以好少到當地四處遊玩。不過，Jeffrey日前就喺社交網站上載咗一張兩父子嘅合照，背景係西樵山南海觀音像。原來今次佢特別帶家人返南海探望親友，兼夾四出遊覽當地名勝，品嘗河鮮、雞仔餅等地道美食，認真了解吓家鄉情況。
讚嘆觀音像
Jeffrey話，南海係一個宜居宜商嘅好地方，旅遊業亦發展得唔錯。今次佢哋難得返去，點都抽時間四出遊玩，包括行咗轉廣東四大名山之一、有「珠江文明的燈塔」之稱嘅南海西樵山。雖然今次已經唔係佢哋第一次到訪該景點，但見到眼前咁宏偉嘅南海觀音像，依然覺得好壯觀同嘆為觀止喎。Jeffrey仲話，如果大家下次去南海旅行，記得要話聲佢知，因為佢可以推薦好多好去處畀大家。