政情：捉實關鍵票 紙上譚兵
政改方案要喺立會通過必須得到至少三分之二嘅議員支持，故此單憑建制派保駕護航，就算加埋身兼民建聯嘅立法會主席曾鈺成投票支持，都仲要撬走泛民主派議員四票先可以成事。近日政圈就不斷猜測邊幾位泛民議員有機會轉軚，政府亦都聲稱要爭取關鍵票支持。不過，前車可鑑，政府喺○五年政改一役都曾力箍所謂嘅關鍵票，最後都係觸礁收場，而一○年嘅政改方案亦非靠關鍵票過關，所以關鍵票想捉都未必捉得緊。
疑似對象企硬有前科
政府前日展開第二輪政改公眾諮詢，雖然泛民早已揚言會杯葛諮詢同否決人大常委會「八．三一」決定下嘅政改方案，但政府仍然聲言會爭取泛民議員支持。政制及內地事務局局長譚志源仲話，一日未到立法會投票顯示板上顯示「否決方案」，佢都唔會放棄，勢要撬走泛民票。而近日仲盛傳，幾位溫和泛民議員包括梁繼昌、莫乃光、馮檢基、李國麟及湯家驊會係政府拉攏嘅關鍵票對象。
不過，呢啲所謂嘅關鍵票並唔係話落多兩錢肉緊同牙力就可以捉得住。先莫講呢幾位疑似撬票對象近日已表明絕不轉軚，睇番○五年嘅政改一役，馮檢基、李國麟、梁耀忠同當時仲係立法會議員嘅譚香文、鄭經翰等都係政府撬票嘅目標，政府直至投票當日都仲盡力游說，結果幾位目標人物最終都投下反對票，令政改方案不獲通過，原地踏步。至於一○年順利通過嘅政改，亦非靠所謂嘅關鍵票，而係民主黨八位議員同民協馮檢基喺談判後轉軚，先至令方案過關。
主席投票隨時「犧牲」
除咗泛民嘅票，去到政改表決重要關頭，慣性不投票嘅曾鈺成，佢嘅一票亦都舉足輕重。曾鈺成早喺去年已經明言，主席投票並冇違反《基本法》、《立法會條例》同《議事規則》，如果有需要，佢會先投票、後辭職，為違背競選時講過擔任主席時唔會投票嘅承諾負起政治責任。
然而，外界盛傳嘅關鍵票向來都係猜不通、摸不透，一旦曾鈺成最後一刻決定投票，而政府又未能取得足夠泛民議員支持，曾鈺成嘅付出就會得不償失。難怪曾鈺成尋日都公開講，政府嘅方案唔能夠只着眼於爭取泛民四票，而係要爭取大部分泛民議員嘅支持喎。