中環出更：拉布燒錢 志偉自食其「盒」
立法會議員人工高、福利好係人都知，逢星期三開大會更由秘書處安排兩餐甚至消夜，服侍呢班尊貴議員嘅腸胃。不過，由於秘書處只係代議員落「柯打」叫到會服務，平均每餐百幾二百元肯定走唔甩，加上泛民陣營發起不合作運動玩「拉布」，搞到民主黨胡志偉為保荷包，今個立法會期索性捱飯盒都唔幫襯貴價到會。
謝絕立會貴價到會服務
立法會秘書處每年趁新會期開始，都會收集議員叫到會膳食嘅意向，議員落「柯打」後每個月分期付款，平均千幾元一個月。不過，志偉有感以目前時勢，每次大會幾乎都要拖足三日先開得完，分分鐘一日三餐都要叫到會先掂，喺少數怕長計下，佢就寧願餐餐出去平食，一年就可以慳番約萬幾元喇。
除咗志偉，鍾樹根都冇畀錢秘書處叫到會，樹根解釋係因為經常有工作飯局，寧願趁空檔出去食飯做嘢，都唔想困坐立法會。不過，樹根話佢個個月都會帶團參觀立法會，每次都好識做自掏腰包請團友食埋飯先走，每人每餐盛惠約三百元，一年都「進貢」唔少o架！
卓妮