中環出更：波詩賀佳節 極度難忘
唔係個個都有合適體魄去南北極探索，「極地博物館基金」日前就喺理工大學舉辦《極地30情獻》籌款晚會，為推動未來極地科研工作及建立極地資料庫籌募資金，讓無機會去嘅人都可以深入認識極地氣候及環境變化嘅最新情況。晚會獲唔少去過極地嘅城中名人到場支持，仲分享到極地探索嘅趣事。
基金創辦人李樂詩開玩笑話，要趁自己失憶之前盡量記錄多啲喺極地考察嘅成果。身旁嘅發展局局長陳茂波就話，佢同李樂詩相識二十幾年，九三年仲一齊組團，一行十幾人喺南極度過白色聖誕。
坐「坦克」雪地車兼濕平
陳話，最難忘當年長城站職員用類似坦克車嘅雪地車接載佢哋，途經俄羅斯考察站時，眾人仲化身購物團齊掃襟章及小飾物，回程時則於亞馬遜森林過咗個暖笠笠新年。
有份捧場嘅仲有社企Green Monday創辦人魏華星及楊大偉（David）、康宏集團主席王利民（Quincy）、香港專業及資深行政人員協會理事楊素珊。曾經同魏華星一齊參加過北極馬拉松嘅Quincy透露，兩周後出發智利及南極跑馬拉松，挑戰自我。David就笑言飲食先係佢強項，佢話五月米蘭嘅世博主題與食物環保有關，開正佢個範疇，適逢四月底又係佢哋社企成立三周年，到時會去當地參觀兼慶祝。
想去極地嘅仲有仁濟醫院主席蘇陳偉香，佢話之前去九寨溝時試過高山症發作，自知體能未必應付到極地，就費事冒險喇。天文台台長岑智明本來下月都想去南極，可惜同工作會議撞期，惟有等下年再去喎。
卓妮