港府成日宣傳「吸煙危害健康」，其實，呢啲阿媽係女人嘅道理，邊個唔識講吖，問題係，危害健康又點呢？當局控煙獨沽加稅一味，次次加完就關人個關，結果益晒私煙集團，煙民又唔見減少，簡直弄巧成拙，適得其反。
嗱，新一年啱啱開始，加風又起喇，吸煙與健康委員會建議政府大幅增加煙草稅一倍，每包由三十八元稅加到七十六元，零售價接近百元一包，問你怕未。當局話喎，加稅可令更多煙民戒煙，煙民比率有望喺一、兩年內由大約一成降至單位數字。
講就係咁講嘞，實際係點嘅呢？政府統計處數字顯示，香港十五歲以上人士每日吸煙率約一成，相當於六十四萬五千人，話就話係三十年來最低比率，不過咁，女性煙民比率不跌反升，九○年至今幾乎多咗一倍，達到十萬人咁滯。仲有呀，高小學生煙民比例亦直線上升，當中小四至小六男生吸煙比例升幅最驚人，兩、三年間激增一倍有多。
最弊嘅係，加稅造成走私問題，搞到私煙愈來愈多。早前有團體調查發現，本港私煙消耗量連續兩年超過三成，唔止導致庫房損失三十二億元稅收，私煙問題喺十四個亞太地區之中「名列前茅」，排名第三，僅次於汶萊及馬來西亞咋。正如業界人士話齋，港府近年兩度大幅調高煙稅，擴大與鄰近地區嘅香煙售價差距，結果造成反效果，煙民識得揀，梗係揀私煙喇。
所以話，當局嘅控煙政策自相矛盾，一方面叫人戒煙，一方面又唔捨得煙稅，簡直虛偽。大家有眼睇o架，加煙稅受益嘅唔係市民健康，而係私梟荷包，都唔知好嬲定好笑。最荒謬嘅係，當局唔捨得煙稅不特止，仲要整色整水，學人大搞室內禁煙，點知控煙辦有法不依，執法不嚴，導致烏煙瘴氣。呢，曾經有市民舉報網吧有人吸煙，結果等咗三日都唔見控煙辦派人執法，你話係咪離譜吖。其實，愈來愈多人喺室外食煙，巴士站係咁，食肆門口亦係咁，搞到非煙民被迫吸食二手煙，仲衰過未實施室內禁煙。
係人都知，要有效控煙，淨係一味加稅係唔夠嘅，最重要係做好宣傳教育同埋加強打擊私煙。可惜吖，咁簡單嘅道理，偏偏當局點極唔明，唔怪得控煙得個吉喇。都係古人講得啱，世不患無法，而患無必行之法。香港要做無煙城市好簡單啫，直接禁煙咪得囉，使乜搞咁多嘢吖！