政府政改三人組尋日到立法會宣布展開政改第二階段公眾諮詢，人民力量議員陳偉業（大舊）發言時就大鬧政制及內地事務局長譚志源（Raymond）同上任局長林瑞麟（林D9）一樣都係「人肉錄音機」，重複又重複回應之餘仲要了無新意，激到Raymond紥紥跳咁向主席曾鈺成投訴。Raymond話根據佢嘅記憶，大會質詢環節係唔可以用花名或別名，要求主席裁決。
當主席正要開口講嘢時，大舊即時彈起身話林D9已經去咗讀神學，反寸Raymond無嘢搵嘢嚟講。不過，曾鈺成話唔覺得大舊嘅言論有違反《議事規則》，要求Raymond繼續答問題。社民連梁國雄（長毛）喺呢個時候就爆出一句：「太監通常都係讀神學」，曾鈺成就即時叫長毛收口，話出席會議嘅官員同議員一樣享有同等權利，要求議員尊重官員。
Raymond話，既然曾鈺成已經作出裁決，佢會尊重主席嘅決定。不過，佢呢頭話尊重裁決，嗰頭就托人傳張紙仔畀曾鈺成。曾鈺成睇完張紙仔後即時攞本《議事規則》揭咗幾揭，再喺張紙仔上寫咗幾行字還畀Raymond。Raymond睇完張紙仔後即時蹺晒手兼鼓埋泡腮，似乎唔多滿意主席嘅解釋。