政情：中環出更：「過來人」嫻姐 責阿柱太操勞
立法會社福界議員張國柱早前被診斷患上惡性胃黏膜淋巴瘤，要向立法會請兩個月假接受治療。尋日係阿柱放長假後首日復工嘅日子，佢透露接受電療後康復進度理想，胃口亦比以前好咗好多。不過，佢自爆早前當佢返立法會主持福利事務委員會會議時，工聯會陳婉嫻就以過來人身份鬧佢做乜唔多啲留喺屋企休息，話休息多啲先會快啲好。
應休息多啲
嫻姐曾經喺○三年患乳癌，經過長時間治療及休養後痊愈，對積極抗癌有一定心得。阿柱話，佢最初返立法會主持會議時，嫻姐只係叫佢休息多啲，但當佢第三、四次主持會議時，嫻姐突然鬧佢做乜要返立法會開工，仲叫佢唔好成日掛住返工，估唔到嫻姐咁關懷競爭對手。阿柱於是聽話唔再成日返立法會做嘢，等新一年先至再「搏殺」。
阿柱透露，目前除咗要接受電療外，每日仲要食中藥，實行中西合璧雙管齊下，務求可以快啲好番。佢又話，由於依家比以前食多咗嘢，所以重咗兩至三磅，下星期會再去覆診，希望到時會有好消息公布。
卓妮