前輩報人說過一個笑話：香港人玩啤牌，打完一局後，有人常常說：「我這底牌是Ａ是Ｑ。」旁人不信，就會說：「你這牌如果是Ａ，我就吃了下去。」這種話說得很多，但真有人把啤牌吃下去的，我卻從來沒有見過。
誠然，賭仔多牙擦，馬迷亦常自吹自己所貼的馬，這匹若然三甲不入，我吞咗佢！要是講者真是信守諾言，恐怕死得人多矣！早前，警方展開終極清場行動，本已將牛鬼蛇神、禍港妖孽一網打盡，可惜警方卻上演「有如慈母」一樣保護知法犯法嘅佔領者，一一將之放生，激起全城嘩然！
一哥出席記招時又揚言，三個月內完成所有佔中調查，將佔領主導人物「緝捕歸案」；好嘞，日前警方終展開第二波針對佔領搞手嘅「拘捕行動」，之不過變成慈祥祖母對待一眾佔領搞手、幕後黑手，輕聲細語問佢哋有冇時間、得唔得閒，就差沒有請示對方是否需要擇定黃道吉日才可上警署「協助調查」；一眾搞手全部採「拖」字訣、有啲話「唔方便」、有啲話要諮詢律師意見才決定如何處理……總之，唔同嘅日子有唔同嘅決定，幸好一哥當時沒有豪氣干雲的學黑猩猩揼心口：三個月內如不能將佔領主導人物緝捕歸案，我將佢哋全吞了下去！
將於今年五月五日屆五十七歲退休年齡嘅警隊一哥，是否能將佔領搞手一一緝捕歸案，老朽未敢樂觀，皆因退休前，一哥已由「慈母」再榮升一級至「慈祥祖母」；老毛說：革命不是請客吃飯！而慈祥祖母般嘅一哥則彷彿在說：拘捕行動係氹唔肯食飯嘅小朋友走近飯桌！此人之將休，其言也善乎？
香港嘅管治水平已淪落至慘不忍睹，香港明日，睇怕亦只能是「劫灰滿眼看愁絕，坐守寒灰更可哀」！