政黨每年開支數以幾百萬元計，唔少政黨都會透過街頭募捐或舉辦籌款晚宴。向來「莫財」嘅民主黨（白鴿黨），原訂喺去年十月舉行二十周年黨慶兼籌款晚宴，但早前以應付佔領行動為由，將晚宴押後至今年二月先至舉行，籌款目標仲由最初嘅六百萬元大幅調低至三百萬元，愈籌愈縮，就連該黨兩名副主席尹兆堅及羅健熙都似乎睇淡今年籌款情況。
今年係白鴿黨創黨二十周年，一早豪言話要「搞大佢」，仲定出六百萬元籌款目標。不過，籌款委員會主席李華明上月突然改口，話已經將籌款目標調低至三百萬元，足足少咗一半。羅健熙尋日被問到對今年籌款晚宴嘅情況樂唔樂觀時，就話「正常囉，同之前講過嘅差唔多啦」，又話該黨一向都好努力籌款，例如賣下獎券咁。
其實，一班老鴿喺佔領行動後玩自首同留守「博拉」，估計上庭所牽涉嘅律師費已經過百萬元，加上白鴿黨喺佔領行動嘅表現，已令唔少過往願意捐錢嘅支持者閂水喉。
再睇番上星期社民連舉辦籌款晚宴，雖然筵開六十幾圍，又即場搞拍賣籌款，聽聞最終只係籌到十八萬五千元，可謂旺丁唔旺財。照咁睇，白鴿黨籌款都唔好得去邊，一班白鴿應該好好諗下點樣可以籌多啲錢，否則都幾頭痕！