一個人要令人留低深刻印象，外表都要有啲特徵，好似基督教正生書院校長陳兆焯，佢最令大家記得嘅就係一頭白髮、滿臉鬍鬚及羊咩鬚，配合埋黝黑皮膚，盡顯滄桑感。不過，呢種特質唔係一朝一夕，而係經歷過歲月洗禮得來。尋日我哋就喺社交網站發現一張陳兆焯廿幾年前喺匯基書院做教師時嘅校刊相片，佢八十年代嘅樣貌青澀，頭髮濃密而且中間分界，又帶副當年時興嘅大框眼鏡，望落有啲似當年溫拿樂隊成員陳友，唔知陳兆焯過咗幾多年先至改變形象呢？
（互聯網）
