政情：唔怕辣唔畏高 政助紛買樓
港府採取雙辣招打擊炒樓，但反而令細價樓夾升，頻頻破頂，樓價高處未算高。就連政府官員都無懼高樓價，上月最少有兩位政治助理決定入市，分別係勞工及福利局政助黎穎瑜（Jade）及民政事務局政助徐英偉（Caspar），前者喺九龍城買住宅單位，後者就由太太出手買咗個深水埗住宅單位，似乎兩人都睇好後市，尤其係九龍西嘅升值潛力。
我哋最近翻查各政助嘅利益申報表，發現部分政助不約而同喺去年底入市，例如本身喺加拿大同美國都有物業出租同自用嘅Caspar，去年十二月一號就向政府申報，決定只保留加拿大物業，已將美國拉斯維加斯嘅「分時渡假物業」出售，十一月底申報太太入咗貨，喺深水埗買咗層樓，主要畀其他家庭成員自住。
Jade夫婦物業多 收租和味
其實Caspar同太太之前曾聯名買咗一層深水埗物業，但佢太太就喺十月將自己擁有嗰一半過埋畀Caspar，所以今次佢太太再喺深水埗入貨，就唔使繳交雙倍印花稅，果然係精明消費者。Caspar話，今次佢太太都唔係買新樓，亦唔係市建局嘅新樓，只係同區普通舊樓啫。
之於勞福局政助阿Jade亦唔輸蝕，上月平安夜佢向政府申報買咗個九龍城區一個物業，亦係佢首次喺香港置業，所以完全唔使驚雙辣招帶來影響。不過，咪以為阿Jade係樓市新手，佢申報一直擁有一個廣州商業單位出租，又有一個倫敦住宅物業放租，加埋佢老公喺日本東京有個住宅物業放租，兩公婆單係收租都相當和味。
西環升值 陳岳鵬唔捨得搬
講起物業升值，當然要提西環啦！近日受惠堅尼地城港鐵延線開通，西環一帶物業隨即暴升。芸芸政助之中，以政制及內地事務局政助陳岳鵬最好眼光，聽聞佢未加入政府前，已經喺西環置業，現時未夠十年，保守估計層樓升值不少。不過，陳岳鵬話暫時無意賣樓，因為現時西環交通方便，又有唔少高質西餐進駐，唔捨得搬走喎。
話時話，每名政治助理月薪平均接近十萬元，要買樓照計無乜難度，但要追上私人市場加幅就好難，因為政府未來幾年未必會檢討問責官員薪酬，睇怕都唔使旨意加人工嘞，如果真係要搵真銀，唔諗吓投資點得呢？