中環出更：八両金看中周永康 敖暉唔驚
學聯秘書長周永康同副秘書長岑敖暉去年喺佔領行動期間經常孖公仔出入，而且合作無間，早已被嗜好惡搞嘅網民視為「一對」，但兩人被警方拘捕在即，剛萌芽嘅「戀情」竟殺出一個程咬金，「第三者」更點名想同周永康做朋友，呢位仁兄竟然係藝人八両金！
佔領行動初期曾現身金鐘力撐學生嘅八両金，尋日突然再現身政府總部連儂牆「遺址」對開，原來佢只係喺附近飲完茶行過。講起班佔領嘅後生仔，八両金突然興起爆料指周永康「都係我同鄉喎！」聽聞周同佢都係福建人。八両金話，雖然佢對政治冷感，但對人好有熱情，好想同呢位鄉里飲茶傾吓偈，好可惜連周永康手提號碼都未攞到。不過，佢坦言對三個學生領袖都「唔知邊個打邊個」，但三個都好靚仔喎。
「歡迎加入競爭」
八両金走咗冇耐，岑敖暉亦喺同樣地點回應民情報告，雖然佢同八両金緣慳一面，但難得佢相當豁達，竟然表明歡迎八両金加入競爭，但亦對自己好有信心咁話。岑敖暉講到八両金好似同佢爭周永康咁，睇嚟依家政界真係要靠自製緋聞博上位嘞。
卓妮