踏入新一年，本來應該有新氣象，可惜吖，佔領搞手繼續逍遙法外，佔領行動隨時死灰復燃，新氣象就冇喇，新亂象就有。嗱，港府本周將向港澳辦提交民情報告，第二輪政改諮詢亦緊貼展開，風頭火勢，一班牛鬼蛇神唔玩鋪勁至奇。正如「東方報業民意調查」顯示，受訪市民一面倒批評當局畏首畏尾，放生佔領黑手，遲早引火自焚。
二○一五年開局不順，上海發生人踩人慘劇，香港亦唔好得幾多，大有山雨欲來風滿樓嘅景象。大家有眼睇，「鳩嗚團」到處流竄，搞到市民不勝其煩，商戶怨聲載道，警方疲於奔命。啱啱過去嘅除夕，上街慶祝嘅市民不足三十萬，創下近年新低，咪就係因為好多人怕咗「鳩嗚團」囉。農曆新年就快到嘞，到時唔知又會發生乜嘢事。
仲有吖，立法會門外及添美道一帶，佔領人士繼續死守，帳篷數目愈來愈多，物資站愈來愈有規模，搞到成條「村落」咁，擺明想長期抗爭，唔搞死香港唔肯罷休。點解搞成咁，咪就係因為港府有法不依囉。「東方報業民意調查」顯示，對於港府拖延執法，又唔徹底清場，四成四受訪者指摘佔領者有恃無恐，不斷搞事；兩成二批評當局畏首畏尾，拖泥帶水；一成八直指遺下禍根，後患無窮。
冇錯嘞，佔領鬧劇重創法治、破壞經濟、撕裂社會，搞到香港幾乎萬劫不復，直情係「不可一、不可再」，偏偏當局放軟手腳，呢頭捉人，嗰頭放生，簡直就係變相鼓勵佔領。正如四成受訪者話齋，當局必須盡快拉人，斬草除根；兩成四憂慮幕後黑手捲土重來；一成九更擔心佔領鬧劇沒完沒了。
市民唔係杞人憂天o架，外部勢力同香港反對派一唱一和，遙相呼應，一時威脅可能發生暴動，一時又恐嚇隨時進入緊急狀態，如果話佢哋冇政治目的，細路仔都唔信喇。嗱，佔中「金主」兼總指揮淫賤黎近日又同佔中三醜、李漢奸以及政治主教密密斟，唔使問阿貴，一定又係玩陰謀詭計喇。
面對佔領鬧劇隨時捲土重來，立法會最高危，當局唔敢怠慢，打算推出十幾項「辣招」應對，包括限制示威者逗留時間、禁止攜帶帳篷等等。睇嚟就似模似樣喇，但究竟有冇用呢？咪話功夫茶潑冷水，幕後黑手無所不用其極，之前連法庭禁制令都視為廢紙，又點會將立法會嘅所謂辣招放在眼內吖。講到底，放虎歸山，遺患無窮，當局前怕狼後怕虎，驚咗外部勢力，盞自取其辱嘅咋！