政情：何啟明：貪曾冇被拉 遺禍怨氣多
傳聞話下星期公布嘅施政報告，喺青年問題將將有所著墨。尋日嘅港台《城市論壇》本來係想討論下施政報告嘅期望，民協青年成員何啟明一開口就話「完全無期望」，然後就開始力數政制不公，先令民生問題拖住，仲更加鬧埋貪曾前特首曾蔭權爵士添。
批六大產業「去晒邊？」
何啟明話，「大家睇下曾蔭權，佢貪污貪到出晒面啦，但係佢唔使畀人拉，繼續可以退休。」何啟明仲批評佢任內施政，「講話咩六大產業，全部產晒去邊呢？」咁又係呀，香港今時今日唔少問題，都係貪曾時代遺留落嚟嘅，如果唔係，香港人又點會有咁多難以排解嘅怨氣吖。
除咗貪曾惹火，另一嘉賓香港社區組織協會幹事蔡耀昌（九哥）又係一個大火頭，事關九哥早排就幫新移民爭取唔需要居港七年都可以拎綜援，唔少台下觀眾下下都針對九哥，要佢去為新移民請命嘅同時，都要去聯合國為香港人請命喎，又鬧佢係「離地泛民」，應該除走。