時下愈嚟愈多人養寵物，對獸醫服務嘅投訴亦逐年增加，立法會一法案委員會討論修改《獸醫註冊條例》，將管理局原有十名成員擴大至十九名成員，當中註冊獸醫由六人倍增至十二人，新增嘅六名獸醫由業界自行推選產生，獸醫同非獸醫成員比例維持喺二比一。議員蔣麗芸（阿Ann）不滿獸醫權力過大，諗住就法案提出修正案，但就慘被黨友叫停。
話說阿Ann同黨友透露自己有意提修正案時，黨內有人隨即勸佢唔好咁做，事關民建聯不嬲主張用同政府對話方式解決問題，而唔係郁啲就提出修正案，所以佢哋一直好少就政府提出嘅法案作出修訂，費事被人誤以為佢哋要同政府對着幹。
阿Ann話，雖然佢都明白黨友嘅苦心，但因為政府對獸醫業缺乏監管，令獸醫出現濫收費嘅情況，對寵物主人唔公道。
佢話自己會先同約食物及衞生局官員傾，睇下佢哋肯唔肯自我更正，別無他法下先會考慮提出兩項修正案，修改管理局內註冊獸醫同非業界代表比例同上訴機制，監管獸醫業界百病叢生嘅情況。