政情：(舌累)政改對話 學民食檸檬

其實以公開信邀請政壇中人會面，一直都係學界慣用手法，近期最經典案例，要數學聯喺去年佔領行動初期，向政務司司長林鄭月娥發信，最終雙方於十月下旬破天荒對話，雖然最終冇成果未能令佔領行動提早退場，之不過無份參與對話嘅學民一直酸溜溜，黃之鋒等人都試過於佔領行動末段，以絕食方式要求同政府官員會面，然而一直未獲當局正面回應。

踏入二○一五年，學民又再出招發出公開信，不過今次對話對象非政府官員，而係四名政界人士，包括行政會議召集人林煥光、行會成員陳智思、前政務司司長唐英年（唐唐）同前財政司司長梁錦松（阿松），事關佢哋四人都講過青年人係香港希望，目標係農曆新年前可以公開會面，討論重啟政改嘅重要性同可行性。

有人「拖字訣」 有人唔回應

對於學民嘅公開對話訴求，唐唐透過發言人回應指，等政府第二階段諮詢推出，了解內容後再決定，阿松就話暫時唔回應，據聞林煥光亦暫冇回應，似乎學民借人抬高自己身價呢招，暫時都係行唔通，據聞就算真係失敗，學民都打算轉移目標，例如再搵其他行會成員幫手。

講番學民新一年嘅行動，學民發言人黎汶洛就話，會趁政改第二階段諮詢，特首梁振英同政改三人組落區時候，喺場內場外提問同請願，之後又會擺街站、搞公民教室同寄文宣入屋，當中特別提到郵政署之前話佢哋之前有一批文宣涉及淫褻不雅，如果今次都唔畀寄出嘅話，隨時會作出司法覆核喎。